puuchaa kisii ne haal kisii kaa to ro diye

puuchaa kisii ne haal kisii kaa to ro diye
paanii meN aks chaaNd kaa dekhaa to ro diye

naGhmaa kisii ne saaz par chheRaa to ro diye
Ghunchaa kisii ne shaaKh se toRaa to ro diye

(naGhmaa : song; saaz : equipment; Ghunchaa : blossom; shaaKh : branch)

uRtaa hu’aa Ghubaar sar-e-raah dekh kar
anjaam ham ne ishq kaa sochaa to ro diye

(Ghubaar : dust; sar-e-raah : on the way; anjaam : result)

baadal fizaa meN aap kii tasviir ban gaye
saayaa ko’ii Khayaal se guzraa to ro diye

(fizaa : ambience; tasviir : image; saayaa : shadow; Khayaal : imagination)

rang-e-shafaq se aag shiGhuufoN meN lag gayii
“Saghar” hamaare haath se chhalkaa to ro diye

(rang-e-shafaq : colors of the rainbow; shiGhuufoN : bud, blossom)

Read More

Mahfilain Lut Gayen Jazbat Ne Dam Tor Dia

Mahfilain Lut Gayen Jazbat Ne Dam Tor Dia

Saaz Khamosh Hain Naghmaat Ne Dam Tor Dia

Har Mussarat Gham-e- Deeroze Ka Unwaan Bani

 Waqt Ki God Main Lamhaat Ne Dam Tor Dia

An Gint Mahfilain Mahroom Charaghan Hai Abhi

Kon Kahta Hai Ke Zulmaat Ne Dam Tor Dia

Aaj Phir Bujh Gaye Jal Jal Ke Umeedon Ke Charagh

Aaj Phir Taaron Bhari Raat Ne Dam Tor Dia

Jin Se Afsana -e -Hasti Mai Tasalsul Tha Kabhi

In Mohabbat Ki Rawayaat Ne Dam Tor Dia

Jhilmilatay Huay Ashkon Ki Lari Toot Gayi

Jagmagati Huyi Barsaat Ne Dam Tor Dia

Haaay Aadab-e- Mohabbat Ke Takazay Saghir

Lab Hilay Aur Shikayaat Ne Dam Tor Dia

Read More