tere honton pe tabassum ki woh halki si lakeermere takhaiyal mein reh reh k jhalak uthti hai
youn achanak tere aariz ka khiyal ata hai
jaisey zulmat mein koi shama bhadak uthti hai
tere pairahan-e- rangeen ki juno khaiz mehak
khawab ban ban k mere zehan mein lehrati hai
rat ki sard khamoshi mein har aik jhonkey se
tere anfaas tere jisam ki aanch ati hai
mein sulagte howey raazon ko ayaan to kar doon
lekin in raazon ki tash,heer se ji darta hai
raat k khwab ujale mein byaan to kar doon
in khawabon ki tabeer se ji darta hai
teri sanson ki thakan teri nigahon ka sakoot
darhaqeeqat koi rangeen shararat he na ho
mein jisey pyar ka andaz samajh baitha hoon
woh tabassum woh takallum teri adat he na ho
sochta hoon k tujh se mil k mein jis soch mein hoon
pehle is soch ka maqsoom samajh loon to kahun
mein tere shehar mein anjan hoon pardesi hoon
tere altaaf ka mafhoom samajh loon to kahun
kahein aisa na ho paon mera thara jai
aor teri marmarein banhon ka sahara na mile
ashk behte rahein khamosh siyah raton mein
aor tere raishmi anchal ka kinara na nile
0 comments:
Post a Comment